ភ្នំពេញ៖ រដ្ឋបាលខេត្តមណ្ឌលគិរីសហការជាមួយវិស័យឯកជន គ្រោងរៀបចំកែលម្អតំបន់រ៉ែមាស សម្រាប់ឱ្យភ្ញៀវទេសចរទៅលេងកម្សាន្តដើម្បីស្វែងយល់ពីសោភ័ណភាពនៅទីនោះ។
អភិបាលក្រុងសែនមនោរម្យ ខេត្តមណ្ឌលគិរី លោក ហៀក សុផាន បានឱ្យវិទ្យុជាតិថា ដើម្បីឱ្យអ្នកទេសចរដែលមកលេងខេត្តមណ្ឌលគិរី មានកន្លែងកម្សាន្តកាន់តែសម្បូរបែបនិងបង្កើនស្នាក់នៅបានយូរអង្វែង អាជ្ញាធរខេត្តគ្រោងសហការជាមួយក្រុមហ៊ុនរើណេរហ្សង់ក្នុងការរៀបចំតំបន់រ៉ែមាសឱ្យទៅជាកន្លែងសម្រាប់អ្នកទេសចរចូលសម្រាកកម្សាន្តនិងទស្សនាពីការរុករករ៉ែតាំងពីដំណាក់កាលដំបូងរហូតឈានទៅចម្រាញ់ចេញជាមាសដុំដែលគេច្នៃទៅជាគ្រឿងអលង្ការដ៏មានតម្លៃ ពិសេសជាងនោះមានអ្នកនាំភ្ញៀវចាំពន្យល់ពីការចម្រាញ់រ៉ែមាសផងដែរ។
លោកបញ្ជាក់ថា ទៅថ្ងៃអនាគតនៅតំបន់នោះនឹងមានឱកាសការងារដល់ប្រជាពលរដ្ឋយ៉ាងច្រើនផងដែរ។ គួរជម្រាបថា ក្រុមហ៊ុនរើណេហ្សង់ គឺជាក្រុមហ៊ុនទី១ ដែលបានចាប់ផ្ដើមផលិតមាសជាលើកដំបូង នៅប្រទេសកម្ពុជា។ ក្រុមហ៊ុននេះ បានចាប់ផ្ដើមសម្ពោធដាក់ឱ្យដំណើរការជាផ្លូវការអាជីវកម្មរបស់ខ្លួននៅថ្ងៃទី២១ ខែមិថុនា ឆ្នាំ២០២១៕